【明報專訊】食物環境衛生署近年積極推展綠色殯葬，截至上月底，綠色殯葬中央登記名冊有近1.6萬人登記。食環署高級衛生督察李啟倫喺政府新聞網話，已故登記者中，超過七成人揀用綠色殯葬；而綠色殯葬嘅使用率亦喺去年創新高，達18.2%。
食環署亦有舉辦紀念花園導賞團、「人生學堂」活動系列等，介紹綠色殯葬，日前就帶咗一班老友記參觀屯門曾嘴紀念花園同曾嘴靈灰安置所，有參觀者到訪後改變咗對綠色殯葬嘅睇法。
第一次參觀嘅87歲婆婆蔡秀玲話，「曾聽說流浪貓狗會把骨灰吃掉，原來不是真的，原來紀念花園景色優美，更可欣賞海景」。同樣87歲嘅鄭廷飛之前已參觀過鑽石山同哥連臣角嘅紀念花園，佢話已同咗仔女講，想將骨灰撒喺紀念花園，話咁係「最理想嘅安排」，仲話「生於斯、長於斯、死於斯，你話幾好」。
現時食環署轄下嘅紀念花園有13個，今年第三季將會啟用喺沙田石門嘅無煙靈灰安置所同紀念花園。